Uniondeb Academaidd

Fel un o fyfyrwyr Prifysgol Wrecsam, byddwch yn ymuno â’n cymuned academaidd a byddwch yn cyfrannu at y gymuned honno. Disgwylir ichi fabwysiadu gwerthoedd uniondeb academaidd a’r egwyddorion a ddylai dywys eich dysgu a’ch ysgrifennu academaidd. Mae’r egwyddorion hyn yn cynnwys:

• Gonestrwydd – Byddwch yn agored ynglŷn â tharddiad eich syniadau a byddwch yn eu cydnabod yn ffurfiol trwy gyfeirio atynt.
• Tegwch – Byddwch yn cyflwyno eich gwaith gwreiddiol eich hun ac ni fyddwch yn ceisio ennill mantais trwy ddefnyddio dulliau annheg.
• Cyfrifoldeb – Byddwch yn gyfrifol am eich dysgu eich hun; mae hyn yn golygu eich bod yn gyfrifol am sicrhau eich bod yn deall yr hyn sy’n ddisgwyliedig ohonoch a’ch bod yn deall gofynion academaidd eich modiwlau.
• Parch – Byddwch yn parchu gweithiau pobl eraill, gan gydnabod y rhai a ddefnyddiwyd gennych i ategu eich gwaith eich hun.

Mae’n bwysig i’n holl fyfyrwyr ddeall pwysigrwydd uniondeb academaidd a’r egwyddorion hyn. Pe bai myfyriwr yn methu â dilyn yr egwyddorion hyn, gallai hynny arwain at honiadau o gamymddwyn academaidd ac yn y pen draw gallai arwain at eich tynnu o’r brifysgol. Efallai eich bod wedi dod ar draws cyngor neu ganllawiau gwahanol yn eich gwlad neu eich man astudio blaenorol, felly mae’n bwysig ichi wybod beth yw disgwyliadau Prifysgol Wrecsam. Gall myfyrwyr sy’n camymddwyn yn academaidd, yn enwedig os byddant yn twyllo’n fwriadol, wynebu canlyniadau difrifol a allai effeithio ar eu hastudiaethau academaidd a’u gyrfaoedd yn y dyfodol.

Fel myfyriwr, gallwch ategu eich uniondeb academaidd eich hun trwy gydnabod yn glir yr wybodaeth a ddefnyddiwch. Gallwch wneud hyn trwy ddefnyddio dulliau dyfynnu a chyfeirio cywir. Hefyd, dylai eich gwaith fod yn waith a luniwyd gennych chi a dylech ysgrifennu yn eich geiriau eich hun. Dyma rai pwyntiau allweddol y dylai myfyrwyr eu hystyried:

•    Mae myfyrwyr yn gyfrifol am uniondeb eu gwaith academaidd a’r hyn a ddysgant.
•    Trwy dderbyn egwyddorion uniondeb academaidd, bydd modd gwella eich gwaith academaidd a chewch y siawns orau o lwyddo.
•    Byddwch yn cael cymorth er mwyn sicrhau eich bod yn cynhyrchu gwaith ag uniondeb academaidd ac yn osgoi camymddwyn academaidd.
•    Ceir gwahanol fathau o gamymddwyn academaidd ac mae’n hanfodol ichi fod yn ymwybodol ohonynt.
•    Nid yw camymddwyn academaidd byth bythoedd yn dderbyniol.
 

Ceir gwahanol fathau o gamymddwyn academaidd, ac fel un o fyfyrwyr Prifysgol Wrecsam mae’n bwysig ichi fod yn gyfarwydd â nhw. Dyma’r gwahanol fathau o gamymddwyn academaidd:

•    Llên-ladrad
•    Cydgynllwynio
•    Ffugio data/tystiolaeth
•    Camymddwyn ymchwil
•    Twyllo contract – defnyddio melinau traethawd a Deallusrwydd Artiffisial
•    Twyllo mewn asesiadau a amserir (e.e. arholiadau a phrofion yn y dosbarth)

Ystyrir bod pob un o’r rhain yn groes i uniondeb academaidd a bydd y brifysgol yn eu cymryd o ddifrif. Os hoffech gael rhagor o gyngor ynglŷn â’r maes hwn, siaradwch â’ch staff academaidd.